Argentina eta Uruguai

Argentina Hego Amerikako hirugarren ekonomiarik handiena da oraindik azken urteetan jasandako nahasmendu ekonomikoak gorabehera. Aldiz, Uruguairen egonkortasunak Mercosurrerako sarbide erakargarria egiten du.

Energia, industria eta teknologian ahalmen handiko merkatuak

Argentina Hego Amerikako hirugarren ekonomiarik handiena da, eta 640.000 milioi USD inguruko BPG du. Herrialdeak baliabide natural ugari du, nekazaritza-ekoizle nagusienetako bat da, gas eta litio erreserba handiak ditu eta ahalmen erraldoia du energia berriztagarrietarako.

Uruguai egonkortasunagatik eta Amerika eta Karibeko klase ertain zabalena izateagatik nabarmentzen da, biztanleriaren % 60, hain zuzen ere. Era berean, per capita irabaziak altuak dira, eta desberdintasun eta pobrezia-mailak baxuak.

Espero da Argentinako BPG % 3,3 jaistea 2024an, baina % 2,7 igotzea 2025ean. % 289,4ko urte arteko inflazio altua du herrialdeak (2023ko apirilaren eta 2024ko apirilaren artean), eta prezio-gorakadarik handieneko munduko herrialdeen podiumean dago. Zerga-egokitzapen nabarmena eta ziurgabetasun politikoa dela eta, kontsumo pribatua eta inbertsioa eragotziko dute 2024 gehienean.

Espero da Uruguaiko ekonomia % 3,2 haziko dela 2024an. Hazkunde hori esportazioek eta kontsumo pribatuak bultzatuko dute, eta lan-merkatuko hobekuntzek eta Uruguaiko Banku Zentralaren tarte objektiboaren barruan % 3 eta 6 arteko inflazioak eutsiko diote.

2024an Argentinako merkataritza-balantza nabarmen hobetzea espero da, eta 15.000 milioi USD inguruko superabita izatea. Aurreikuspen hori zenbait alderdi gakori dagokio: nekazaritzaren susperraldia eta defizit energetikoaren bihurketa Néstor Kirchner gasbidea abiatzeari eta mineralen, nagusiki litioaren, esportazioa handitzeari esker. Inportazioak jaistea espero da, atzerakada ekonomikoa eta inportazio-prezioen gorakada dela eta.

Uruguairen merkataritza-balantzak superabita izatea espero da 2024rako, nekazaritza-ekoizpena suspertu egin baita 2023ko lehorte gogorren ostean, eta merkataritza-balantza energetikoa hobetu egin baita.

Hainbat negozio-aukera daude bi herrialdeetan. Energian inbertitzea, esaterako. Argentinan, batetik, litioaren ustiaketa-sektorea gora doa, baita gas naturalaren sektorea ere. Uruguai herrialde erakargarria da energia berriztagarrien sektorean inbertitzeko, haize- eta eguzki-energian bereziki, eta azpiegituran teknologian eta energia garbiko proiektuetan inbertitzea oso bideragarria da. Krisi ekonomiko iraunkorra gorabehera, Argentina herrialde erakargarria da softwarearen garapenerako, biztanleriak prestakuntza maila altua baitu. Horregatik, inguru onuragarria da berrikuntza teknologikoari eta web-aplikazioen garapenari lotutako enpresa-inbertsioetarako.

Argentinak industria-oinarri sendoa du, kontsumo zabaleko merkatua eta baliabide naturalen aberastasun handia. Hori dela eta, nekazaritza-produktuen, automobilen eta produktu kimikoen esportatzaile handia da. Herrialdeak arazo larriak ditu: monetaren debaluazioa edo hiru digituko inflazioa, esaterako.
Bestalde, Uruguairen ekonomia moteltzea espero da interes-tasen eta inflazioaren gorakada eta kanpo-eskariaren jaitsiera dela eta. Hazkunde ekonomikoa kontsumo pribatuaren gorakadan oinarrituko da nagusiki. Merkataritza libreko hainbat tratatutan dago Uruguai, eta Hego Amerikako hainbat herrialdetatik gertukoa da. Hori dela eta, oso herrialde erakargarria da inbertitzaileentzat.

Argentinako gobernuak zenbait sektoretan esku hartzen du, eta horrek herrialdeko sektore jakinetan inbertitzea zailtzen du. Egungo zerga-sistema konplexua eta gogaikarria da, eta gainera, sozietateen gaineko zerga oso altua da. Mileiren gobernua presioa jasaten ari da herrialdeko dibisa-erreserba handitzeko. Horregatik, ez da espero sozietateen gaineko zerga epe laburrera jaistea. Inbertsioarentzako oztopo nagusia inflazio-tasa altua da, ez baitu merkatua oso erakargarria egiten.

Uruguaiko merkatua, berriz, erakargarriagoa da nazioarteko inbertitzaileentzat; zerga-sistema eraginkorra, lehiakorra eta ondoko herrialdeetakoa baino hobea baitu. Espero da Premiazko Arretazko Legea atzera bota izanak giro enpresariala hobetuko duela herrialdean. Uste da lege horren onarpenak porrot egin izanak inbertitzaileen konfiantza handituko duela, legedi berri horrek inbertsioarentzako oztopoak ekarriko bailituzke.

Argentinak herrialde askotara esportatzen ditu nekazaritzako produktuak. Herrialdeko ekonomiak hainbat produkturen inportazioarekiko mendekotasun handia du, produktu kimiko eta industrialak edo makineria konplexua, esaterako. Mendekotasun horrek oso zaurgarri egiten du Argentina nazioarteko merkatuek izan ditzaketen arazoen aurrean. Herrialdea zailtasun ekonomiko larriak ari da pairatzen, monetaren debaluazioa edo inflazioaren igoera, besteak beste. Hori dela eta, herrialdean saldu nahi duten enpresek jakin behar dute barne-merkatua asko kaltetu dela.

Uruguaik, berriz, merkatu nahiko irekia du, eta zenbait merkataritza-kide ditu; merkataritza libreko itunekin batzuk, eta muga-zergak mugatuta besteak. Uruguaiko merkatua estrategikoki kokatua dago Hego Amerikako bi ekonomiarik handienetakoen artean: Brasil eta Argentina; eta bi merkatu horietarako sarbide gisa erabiltzen da dituen konexio logistiko eta merkataritza-politikak direla eta. Espero da Uruguaiko merkatua hazi egingo dela, esportazioak eta barne-eskaria handituko direlako.

Macri presidente ohiaren (2016-2020) politikek merkataritzako oztopoak murriztu nahi zituzten, eta inbertsioa handitu. Hala ere, nazioarteko merkataritza zertxobait handitu bazen ere, Argentinak Hego Amerikako muga-zergarik altuenak ditu oraindik (% 7,35eko batez besteko tasa). Muga-zerga horiek direla eta, herrialdea ez da lehiakorra inguruko besteen aldean, eta inportazioei traba gehien jartzen dieten 15 herrialdeen artean dago. Muga-zergarik ohikoenak % 0 eta % 20 artekoak izaten dira (% 13,4ko batez bestekoa ondasunei), eta zenbait produkturi dagokionez, % 35eraino heldu daiteke, automobilen kasuan, adibidez. Hala ere, Milei gobernura iritsi ostean, espero da kanpo-merkataritzaren funtzionamendua desburokratizatu eta erraztu egingo dela.

Uruguairi dagokionez, merkataritza libreko hainbat itun baditu ere, herrialdeak muga-zerga nahiko altuak ditu oraindik ere. Eta hala ere, Mercosur eskualdeko muga-zergarik baxuenak ditu; hortaz, herrialde ona da merkatura sartzeko. Uruguai herrialde interesgarria da inbertitzaileentzat, askotariko merkatua baitu eta hainbat kide baititu eskualdean.

Argentinako burokrazia korapilatsua da, eta horrek enpresentzako diru eta denbora-kostu handia dela esan nahi du. Lege-sistema gobernuaren estrategia jakinek baldintzatzen dute, eta horiek botere legegilearen mende daude oso. Sistema judiziala motela, ez oso eraginkorra eta ustelkeriarekiko zaurgarria da. Sistema legalaren eta judizialaren testuinguru hori dela eta, jabetza intelektualaren eskubideak hobetu beharreko arloa dira herrialdean inbertsio berriak erakartzeko.

Uruguai ustelkeria-tasa txikiko merkatua da, eta gobernuko hainbat-politika iraunkorrek are gehiago murriztu nahi dute. Sistema judiziala independentea, gardena eta sendoa da eta eraginkorra da inbertitzaileak babesteko orduan.