Nazioarteko merkataritzak maximo historiko berriak lortu ditu 2024an, testuinguru global tentsionatu batean

Munduko merkataritzak 33 bilioi dolarreko errekor historikoa lortu du 2024an, zerbitzuen %7ko eta ondasunen %2ko hazkundeak bultzatuta. Hala ere, gorakada hori politika protekzionisten gorakadak, Estatu Batuen eta Txinaren arteko muga-zergen gatazkek eta ziurgabetasun geopolitiko gero eta handiagoak markatutako testuinguruan gertatzen da. Gainera, EB-Mercosur akordioa sinatzeak, bi eskualdeen arteko muga-zergen %90 baino gehiago ezabatzen duena, bultzada berri bat eman diezaieke Europaren eta Hego Amerikaren arteko merkataritza trukeei.

Euskal enpresentzako kanpo-merkataritzaren txostena

Behatokiak merkataritza global erresilienteagoa aurreikusten du 2025ean

Egoera hori sakon aztertzen du Basque Trade & Investment (BasqueTrade) erakundearen Nazioarteko Merkataritzaren Behatokiak, SPRI Taldean integratutako euskal enpresak nazioartekotzeko agentziak.. Seihileko txostena da, eta euskal enpresei ingurune globalaren ikuspegi zehatza eskaintzen die, gero eta zalantzagarriagoa den testuinguru batean egokitzen eta erabaki estrategikoak hartzen lagunduz.

Nahiz eta zenbaki positiboak izan maila globalean, 2024ko lehen hilabeteetan euskal esportazioek % 5eko beherakada izan dutela isllatzen du Behatokiak, 2023ko maximoekin alderatuta. Era berean, inportazioek ere % 1 egin dute behera, baina nabarmentzekoak dira Latinoamerikatik (+% 42) eta Afrikatik (+% 37) etorritako produktuen gorakada esanguratsuak.

Txostenak EB-Mercosur akordioaren garrantzia ere azpimarratzen du; izan ere, 25 urteko negoziazioen ondoren, bi blokeen arteko muga-zergen %90 baino gehiago ezabatuko ditu, eta horrek lehiakortasuna eta aldebiko merkataritza hobetu ditzake. Hala ere, berrespena ez dago ziurtatuta, ingurumen-arauekin eta nekazaritza-sektore sentikorren interesekin lotutako oztopoei aurre egiten baitie.

Bien bitartean, tentsio komertzial globalek, hala nola Estatu Batuen politika protekzionistek eta Txinak ezarritako muga-zergek, ziurgabetasuna sortzen jarraitzen dute nazioarteko fluxu komertzialetan.

2025erako aurreikuspenak

Datorren urteari begira, Behatokiak merkataritza global erresilienteagoa aurreikusten du, garraioaren prezioak egonkortuz, duela gutxi edukiontzien kostuak %26 jaitsi ondoren. Hala ere, Estatu Batuetako merkataritza-politikek, krisi klimatikoak eta gatazka geopolitikoek merkataritza-dinamiketan eragina izan dezaketela ere ohartarazten da dokumentuan, Euskadik munduko gainerako herrialdeekin dituen harremanei bereziki eraginez.