Erresuma Batua eta Irlanda

Euskadik merkatu estrategikoak bilatu ditu Erresuma Batuan eta Irlandan produktu eta zerbitzuen esportaziorako, bereziki automobilgintzaren, energiaren eta teknologiaren sektoreetan.

Brexitak ezarritako zergak gorabehera, Euskadiko enpresek Erresuma Batuarekiko merkataritza-harremanei eutsi diete, eta lege- eta ekonomia-esparru berrietara egokitu dira. Irlanda, berriz, kide gakoa bihurtu da informazio eta komunikazioaren teknologien arloan, eta sektore horretan, gero eta aliantza eta lankidetza gehiago daude Euskadiko eta Irlandako enpresen artean.

Tradizio luzeko merkataritza-harremana

Erresuma Batuak munduko potentzia izaten jarraitzen du merkataritza, ekonomia eta eragin politikoaren arloan, erronkei aurre egin behar izan dien arren, Europar Batasunetik irten ondoren. Maila ekonomikoan, Erresuma Batua munduko seigarren ekonomiarik handiena da BPGan, eta Londres finantzarako gune garrantzitsua da munduan. Hala ere, Brexitaren eraginak zenbait merkataritza-harreman birdefinitu ditu, bereziki Europar Batasunarekin, baina itunak hobetu ditu besteak beste AEB, Japonia eta Australiarekin. Mundu mailako merkataritzan, Erresuma Batua ekonomiarik ireki eta aktiboenetakoa da, bereziki finantza-zerbitzuen, teknologiaren eta manufaktura aurreratuaren sektoreetan. Bestalde, Erresuma Batuak posizio aktiboa du NBEko Segurtasun Batzordeko, NATOko eta G7ko kide iraunkor gisa, nahiz eta Brexitaren ondoren bere nazioarteko diplomazia zalantzan jarri den.

Erresuma Batuko ekonomiaren dibertsifikazioa gakoa izan da ziurgabetasunaren testuinguru globalera egokitzeko gaitasunean eta Brexit osteko egoerari aurre egiteko. Britainiar ekonomia manufakturaren, energiaren eta finantza-zerbitzuen mende zegoen tradizionalki. Oraindik ere mundu mailako liderra da Londres, baina sektore teknologiko berriak gehitu ditu: adimen artifiziala, bioteknologia eta energia berriztagarriak, besteak beste; eta munduko berrikuntzarako gune gisa finkatu da. Sektore sortzailea ere nabarmen hazi da, ikus-entzunezkoak eta diseinua barne.

% 0,4ko hazkundea espero da 2024rako, baina inflazioaren beherakadak, soldata errealen hazkundea indartzeak eta interes-tasen egonkortasunak epe luzera ekonomia hobetzen lagunduko dute. Munduko ekonomiaren dezelerazioak zein Brexitak EBko merkataritzan izan dituen ondorioek Erresuma Batuaren hazkunde ekonomikoa mantsotu dute. 2026-28 denboraldian urteko batez besteko hazkundea % 1,5ekoa izatea aurreikusten da. Ekonomiak mendekotasun handia du zerbitzuen sarrerekiko (enpresa-zerbitzuak, txikizkako merkataritza eta finantzak); hain zuzen ere, BPGren % 80 dagokie.

Erresuma Batuko kanpo-sektoreak funtsezko zeregina du herrialdeko ekonomian, munduko ekonomiarik irekienetakoa baita. Erresuma Batua ondasun eta zerbitzuen munduko bosgarren esportatzaile eta inportatzaile handiena da; eta finantza-zerbitzuak, teknologia eta zerbitzu profesionalak esportatzen ditu bereziki. Londres nazioarteko finantzen gune garrantzitsua da oraindik, eta atzerriko kapitala erakartzen du: nazioarteko bankuen, aseguru-etxeen eta inbertsio-funtsen kokalekua da.

Hala ere, Erresuma Batuko merkataritza-balantzak defizita izaten jarraituko du 2024-2028 denboraldian, eta BPGrekiko % 3n kokatuko dela aurreikusten da. EBtik atera izanak merkataritzari eragin dio, eta Brexit ostean sinatutako merkataritza-aliantza berrien eragin positiboa aurrerago nabarituko da.

Erresuma Batuko merkatua handienetakoa eta dibertsifikatuenetakoa da mundu mailan, eta finantza-zerbitzuak, teknologia eta manufaktura aurreratua, osasun-sektorea eta industria sortzaileak ditu, besteak beste. Londres munduko finantza-gune gakoa da, eta atzerriko inbertsioak erakartzen ditu: banku-industriaren, aseguruen eta zerbitzu profesionalen erdigunea da. Bestalde, hainbat merkatu-aukera eskaintzen ditu adimen artifizialaren eta zibersegurtasunaren arloan, baita energia berriztagarrietan ere, haize eta eguzkia-energian batez ere. Horrez gain, Erresuma Batuko barne-kontsumoa ere sendoa da, eta askotariko eta erosahalmen handiko biztanleriak bultzatzen du.

Erresuma Batuak merkataritzako irekiera handienetakoa duen herrialdea izaten jarraitzeko konpromisoa erakutsi du: merkataritza-itun berriak bultzatu ditu, atzerriko jabetza minimoki murriztu du eta merkataritza-zorro dibertsifikatua sustatu du, Brexit osteko erronkek eta sektore estrategikoetako azterketa zorrotzagoak oztopoak eragin dituen arren atzerriko inbertsioarentzat. Uste da gobernu laborista berriak egungo zerga-politikak mantenduko dituela, baina gainbalioen gaineko zergak handitu ditzake. Halaber, zerga handiagoak ezarriko dizkie energia-ekoizleei, eta moneta-politika zorrotzari eutsiko dio. Inguru juridikoa mesedegarria da atzerriko inbertsioarentzat, patenteen babes sendoa baitago, eta kaudimengabeziaren arloan legedi eraginkorra.

Epe laburrean, ez da aurreikusten Gobernu laboristak aldaketa handiak egitea errentaren gaineko zergari, gizarte segurantzari, BEZari eta sozietateen gaineko zergari dagokionez; energia-ekoizleek soilik egin beharko diete aurre zerga altuagoei. Erresuma Batuak banku-sektore sendoa du, banku elektronikoa barne; eta Londreseko Burtsa du. Europako handiena da, eta munduko handienetakoa Estatu Batuetatik kanpo. Horrek finantza-merkatu bereziki erakargarria eskaintzen du. Hala ere, enpresen gaineko zerga-presioa gora doa, eta moneta-politika zorrotzak ere erakargarritasuna kentzen diote merkatuari inbertitzaileentzat. Oro har, Erresuma Batuak 15. postua du 27 merkatu garatuen artean, eta 87. postua 202 merkaturen artean esku-hartze publikoari dagokionez.

Erresuma Batua merkataritza-merkatu liderra da, funtsezkoa munduko hornikuntza-kateetan, bereziki zerbitzuen sektorean. Inbertitzaileentzako merkatuaren erakargarritasuna zenbait faktorek indartzen dute: merkataritza-bolumen handiek, merkataritza-politika liberalek, Brexit osteko merkataritza-itunak efektibo egiteko etengabeko bultzadak eta sektore aurreratuetako esportazioen lehiakortasun altuak. Hala ere, esportazioaren sarrerak eta bolumenak eskualdeko homologoen emaitzen eta munduko eskariaren mende daude. Aldiz, merkataritza, BPGren ehuneko moduan, Europako merkataritza-potentzien mendekoa da, Alemaniakoaren edo Herbeheretakoaren mendekoa, esaterako. Oro har, Erresuma Batuak 17. postua du 27 merkatu garatuen artean, eta 55. postua 202 merkaturen artean merkataritzako irekierari dagokionez.

Erresuma Batuak merkataritza-erregimen nahiko liberala du. Ez dago dibisa-murrizketarik, eta inportazio-baimenak salgai kopuru mugatuarentzat soilik eskatzen dira. Brexitaren ostean, Erresuma Batuak EBko araudi ugariri eutsi die, baina pixkanaka aldatzen ari dira, eta horrek merkataritza zaildu lezake. Muga-zergak 5.000 lerro ingurutan mantentzen dira, eta zenbait produktuk tasa nabarmenak dituzte; nekazaritza-ondasunek edo ibilgailuek, esaterako. Muga-zergez haragoko oztopoei dagokienez, Ipar Irlandako muga-kontrol konplexu espezifikoak daude Windsor itunaren arabera, baita EBko mugak gaindi ditzaketen osasun-neurri eta neurri fitosanitario zorrotzak ere. Oztopo teknikoak daude EBko araudiarekiko lerrokatze ezagatik, bereziki nekazaritza-bioteknologian eta pestiziden erregulazioan. Bestetik, murrizketak daude kontratazio publikorako, nagusiki espazioaren sektorean. Halaber, arazoak daude jabetza intelektualari dagokionez, bereziki musikaren egile-eskubideen arloan. Zerbitzu digitalek balizko tasei aurre egin behar diete, eta Airbusentzako dirulaguntzek EBrekiko merkataritza-negoziazio espezifikoei bide eman die.

Erresuma Batua lege-arrisku txikiko herrialdea da, eta ustelkeria-tasa oso txikia du. Sistema judizial britainiarrak begirune handiko historia du gatazka eta auzien konponbidean, eta justizia inpartziala eta bidezkoa izateagatik ezagutzen da mundu mailan. Horrez gain, jabetza-legeak sendoak dira, eta lege-sistemak inbertitzaileak babesten ditu.