- Igorreko BATZ eta Natxituako EGOINen bategitearekin, dagoeneko 29 dira INDEUSen parte hartzen duten enpresak.
Bi urtez onlineko bilerak egin ondoren, INDEUS, Industriaren Euskal Plataformako kideak aurrez aurreko bileretara itzuli dira. SPRIren egoitzak hartu zuen INDEUSeko Lantaldeen batzarra, joan den otsaileko Batzar Orokorrean erabakitako egutegi eta ekintza planari jarraituz.
Bilera horretan lehen aldiz hartu dute parte Igorreko BATZek eta Natxituako EGOINek, Industriaren Euskal Plataformarekin bat egin duten azken bi konpainiak. Honenbestez 29 enpresa, zentro teknologiko eta elkarte ditu INDEUSek: AMPO, BATZ, BIELE GROUP, BRTA, CAF, CEIT, CIKAUTXO, COPRECI, DANOBAT GROUP, EGA MASTER, EGA SOLUTIONS, EGOIN, EIKA, ELAY, ENERGIA KLUSTERRA, ESLE ELKARTEA, GAIA KLUSTERRA, GOIZPER, IKERLAN, IRIZAR, MAIER, OREKA IT, ORKLI, ORONA, PETRONOR, SISTEPLANT, TECNALIA, ULMA CONSTRUCCIÓN eta VICOMTECH.
Enpresen interesekoak diren gaien artean Zibersegurtasuna nabarmendu zuten parte hartzaileek eta honen inguruko lanketak eta topaketak antolatzeari ekingo dio plataformak eragile desberdinekin elkarlanean.
Honekin batera, enpresa industrialei zuzendutako produktuak eta zerbitzuak euskaraz sortu eta eskaintzen dituzten enpresen katalogoa egitea erabaki zen martxoaren 31n egindako bileran.
INDEUSek ARITU Injiniaritza gonbidatu zuen bilerara, honek euskaraz sortu eta garatutako ELORA PLMa, produktu industrialaren ezagutza digitalizatzeko sistema aurkezteko.